وزیراعظم عمران خان نے کہا کہ الیکٹرانک ووٹنگ کا عمل شفاف انتخابات کا راستہ ہے۔
تفصیلات کے مطابق وزیراعظم عمران خان سے مشیر پارلیمانی امور ڈاکٹر بابر اعوان نے ملاقات کی اور بجٹ سیشن اور الیکٹرانک ووٹنگ سے متعلق امور پر بھی مشاورت کی۔
ذرائع کے مطابق ملاقات وزیراعظم ہاوس میں ہوئی، آئینی، سیاسی اور قانونی امور پر تبادلہ خیال کیا گیا ، ڈاکٹر بابر اعوان نے الیکٹرانک ووٹنگ سے متعلق پیش رفت سے وزیراعظم کو آگاہ کیا۔
وزیراعظم عمران خان نے کہا کہ پارلیمنٹ کے دونوں ایوانوں میں اس پراسس پر قوم کی نظریں ہیں ۔ انتخابی دھاندلی کو پہلی بار روکنے کیلئے حکومت بھرپور کوشش کر رہی ہے۔
مشیر پارلیمانی امور ڈاکٹر بابر اعوان نے کہا کہ الیکٹرانک ووٹنگ ملک کے انتخابی عمل کا مستقبل ہے ہر صورت قانون سازی ہونی چاہیے ۔ اوورسیز پاکستانیوں کو ووٹنگ کا حق دلانے کیلئے بھی قانون سازی حتمی مرحلے میں ہے۔
بابر اعوان نے کہا کہ الیکشن کمیشن سمیت اسٹیک ہولڈرز کو اعتماد میں لیا جا رہا ہے ۔ شفاف انتخابات اور اوورسیز پاکستانیوں سے کیا وعدہ ہر صورت پورا کیا جائیگا ، اپوزیشن کے ہتھکنڈے منشور پر عمل درآمد سے نہیں روک سکتے۔