پاک فضائیہ کا سی 130 طیارہ پاکستان کی جانب سے افغانستان کے عوام کے لیے امدادی سامان کی پہلی کھیپ لے کر کابل پہنچ گیا۔
سرکاری خبر رساں ادارے ‘اے پی پی’ کی رپورٹ کے مطابق وزیر اعظم عمران خان کی ہدایت پر یہ طیارہ جمعرات کو حامد کرزئی بین الاقوامی ہوائی اڈے پر اترا۔
افغانستان میں پاکستان کے سفیر منصور احمد خان اور پبلک ہیلتھ کے سینئر افسر حاجی عمر نے امدادی سامان متعلقہ افغان حکام کے حوالے کیا جس میں تقریباً 10 ٹن آٹا، ڈیڑھ ٹن گھی اور بھاری مقدار میں ادویات شامل ہیں۔
اس موقع پر میڈیا سے گفتگو کرتے ہوئے پاکستان کے سفیر منصور احمد خان نے کہا کہ اس پرواز کے ساتھ ہی پاکستان کی جانب سے افغانستان کے لیے ہنگامی امداد کا سلسلہ شروع ہو گیا ہے۔
انہوں نے بتایا کہ یہ پہلی پرواز تھی اور دوسری پرواز جمعہ کو قندھار جائے گی جبکہ امدادی سامان کا ایک طیارہ خوست بھی بھجوایا جائے گا اور اب یہ سلسلہ جاری رہے گا۔
ان کا کہنا تھا کہ پاکستان کے سرکاری اور نجی شعبہ کے ساتھ ساتھ خیراتی اداروں کی جانب سے خصوصی پروازوں اور طورخم و چمن کے زمینی راستوں کے ذریعے بھی امدادی سامان افغانستان لایا جائے گا۔
منصور احمد خان نے کہا کہ گزشتہ حکومت کے جانے کے بعد افغانستان میں یقینی طور پر مشکل صورتحال کا سامنا ہے۔
ایک سوال کے جواب میں انہوں نے کہا کہ افغانستان میں انتظامی ڈھانچے کے حوالے سے عبوری سیاسی سیٹ اپ قائم کیا گیا ہے، ہم امید کرتے ہیں کہ یہ عبوری ڈھانچہ افغان عوام کی انسانی، ترقیاتی اور گورننس کی دیگر ضروریات کو پورا کرنے کے لیے کام کرے گا۔
بات کو جاری رکھتے ہوئے انہوں نے کہا کہ جہاں تک مستقبل کے فریم ورک کا تعلق ہے طالبان نے کہا ہے کہ وہ مستقل سیٹ اپ کے قیام پر کام کر رہے ہیں تاہم یہ بعد کا مرحلہ ہے اس وقت افغانستان میں انسانی اور ترقیاتی ضروریات زیادہ اہم ہیں جس کے لیے ہم بین الاقوامی برادری اور دیگر ہمسایہ ممالک کے ساتھ رابطے میں ہیں۔
ان کا مزید کہنا تھا کہ پاکستان نے افغانستان کے حوالے سے تعمیری پالیسی اپنا رکھی ہے اور اس کے اندرونی معاملات میں عدم مداخلت کی پالیسی پر سختی سے عمل پیرا ہے۔
پاکستان افغانستان میں امن و استحکام کے لیے کی جانے والی عالمی کاوشوں کا حصہ رہا ہے، اس کے علاوہ افغانستان کے ساتھ معاشی اور علاقائی رابطوں کے لیے سرگرم ہے۔
انہوں نے مزید کہا کہ افغان عوام پاکستان کی جانب سے انسانی ہمدردی کی بنیاد پر معاونت اور ترقیاتی کاموں اس کے کردار کو سراہتے ہیں