بلال عباس اور حدیقہ کیانی کے ڈرامے ‘دوبارہ’ کا ٹیزر ریلیز

‘رقیب سے’ سے اداکاری کے میدان میں قدم رکھنے والی معروف گلوکارہ و اداکارہ حدیقہ کیانی اور مقبول اداکار بلال عباس کے آنے والے نئے ڈرامے کا ٹیزر ریلیز ہوگیا۔

دونوں اداکار ’دوبارہ ‘ نامی ڈرامے میں اداکاری کرتے نظر آئیں گے۔

یہ ڈراما ساس بہو کی لڑائیوں اور زہریلی محبت کی کہانیوں سے وقفہ لیتے ہوئے جو کہ ڈراموں کا ایک عام موضوع ہیں، مکمل طور پر ایک بہت ہی مختلف موضوع کو چھونے جا رہا ہے۔

ڈراما ظاہر کرتا ہے ‘جب قسمت اسے دوبارہ جینے کا ایک اور موقع دیتی ہے تو وہ یقین سے آگے جاتی ہے لیکن کس قیمت پر’ ؟

 

ٹیزر میں دیکھا جاسکتا ہے کہ ڈرامے کی کہانی حدیقہ کیانی کے کردار کے گرد گھومتی ہے جو اپنے شوہر کے انتقال کے بعد ایک کم عمر لڑکے سے شادی کرلیتی ہے جس کا کردار بلال عباس نے ادا کیا ہے۔

اس میں دکھایا گیا ہے کہ دوسری شادی کرنے پر جوڑے کو اپنے ہی خاندان کی جانب سے تنقید اور رکاوٹوں کا سامنا ہوگا۔

ان کے آنے والے اس ڈرامے کی ہدایات ‘چپکے چپکے ’ کے ڈائریکٹر دانش نواز دے رہے ہیں اور یہ بلال عباس کا ان کے ساتھ پہلا ڈراما ہے۔

ڈرامے کی ہدایات دانش نواز دے رہے ہیں—فوٹو:انسٹاگرام
ڈرامے کی ہدایات دانش نواز دے رہے ہیں—فوٹو:انسٹاگرام

 

ڈرامے کی کہانی مقبول ڈراما نگار ثروت نذیر نے لکھی ہے جن کا تحریر کردہ ڈراما ’قیامت’ بھی گزشتہ مہینوں بہت مقبول ہوا تھا۔

’دوبارہ’ ڈرامے کی کاسٹ میں پاکستان کی سینئر اداکارہ، ہدایت کارہ و پروڈیوسر سکینہ سموں بھی شامل ہیں۔

بلال عباس خان اور حدیقہ کیانی کا یہ ڈراما مومنہ درید پروڈکشنز کے بینر تلے بنایا جارہا ہے جو نجی چینل ہم ٹی وی سے نشر ہوگا تاہم یہ کب سے نشر ہوگا اس حوالے سے کوئی اعلان تاحال سامے نہیں آیا۔