ملک کی تیز تر سماجی و اقتصادی ترقی کیلئے اعلی تعلیم کو فروغ دینے کی ضرورت ہے، ڈاکٹر عارف علوی ہائبرڈ تعلیم کے حجم میں اضافہ ملک میں اعلی تعلیم یافتہ اور ہنر مند پیشہ ور افراد کی تعداد بڑھانے میں مددگار ثابت ہوگا صدر مملکت کی فاونڈیشن یونیورسٹی اسلام آباد بارے دی گئی بریفنگ میں گفتگو

اسلام آباد()صدر مملکت ڈاکٹر عارف علوی نے کہا ہے کہ ملک کو تیز تر سماجی و اقتصادی ترقی کے راستے پر ڈالنے کیلئے اعلی تعلیم کو فروغ دینے کی ضرورت ہے ، ہائبرڈ تعلیم کے حجم میں اضافہ ملک میں اعلی تعلیم یافتہ اور ہنر مند پیشہ ور افراد کی تعداد بڑھانے میں مددگار ثابت ہوگا،صدر مملکت فاونڈیشن یونیورسٹی اسلام آباد کے صدر وقار احمد ملک سے گفتگو کررہے تھے جنھوں نے صدر مملکت کو اعلی تعلیم کے فروغ میں فاونڈیشن یونیورسٹی اسلام آباد کے کردار بارے میں  بریفنگ دی،بریفنگ کے دوران انہوں نے کہاکہ یونیورسٹی تعلیم ، تحقیق اور جدت میں مہارت کے ذریعے انسانی وسائل کی ترقی میں اپنا حصہ ڈال رہی ہے، 2015-2020 کے دوران 8960 طلبا یونیورسٹی سے مختلف ڈگری پروگراموں میں فارغ التحصیل ہوئے ، جبکہ فاونڈیشن یونیورسٹی پی ایچ ڈی گریجویٹس کی تعداد بڑھانے پر توجہ دے رہی ہے ، اس کے علاوہ  یونیورسٹی انڈومنٹ فنڈ کے ذریعے مستحق طلبا ء کو میرٹ وظائف ، ضرورت پر مبنی مالی مدد اور فیس میں چھوٹ فراہم کر رہی ہے،  اس موقع پر صدر مملکت نے  ہدایت کی کہ یونیورسٹی انتظامیہ ایچ ای سی کی اعلی تعلیمی اداروں میں منشیات کے استعمال اور خصوصی طلبا کی فلاح و بہبود کی پالیسیوں کو نافذ کرے ، انہوں نے کہاکہ  نئی پالیسی میں خصوصی طلبا کیلئے ٹیوشن فیس ، ہاسٹل فیس اور یوٹیلیٹی فیس معاف کر دی گئی ، ڈاکٹر عارف علوی نے کہاکہ  یونیورسٹی ہائبرڈ اور ورچوئل ایجوکیشن کو فروغ دینے اور معیاری گریجویٹس پیدا کرنے کیلئے حکمت عملی اور وژن پر نظر ثانی کرے ، انہوں نے کہا کہ دنیا تیزی سے بدل رہی ہے ، پاکستان کو مصنوعی ذہانت  اور کلاڈ کمپیوٹنگ جیسی ابھرتی ٹیکنالوجیز اپنانے کی ضرورت ہے