اسلام آباد( آن لائن ) اراکین پارلیمنٹ کو ان کے رہائشی علاقوں کے فاصلوں کے حساب سے ووچرز دینے کا فیصلہ کر لیا گیاہے ۔
نجی ٹی وی ایکسپریس نیوز کی رپورٹ کے مطابق قومی اسمبلی اورسینٹ سیکرٹیریٹ کی سروس برانچ نے پی آئی سے نئے کرایوں کی تفصیلات مانگ لی ہیں اور فیصلہ کیا گیا ہے کہ نئے کرایوں کے حساب اور اراکین پارلیمنٹ کو ان کے علاقوں کے فاصلوں کے حساب سے ووچرز دیے جائیں گے۔ذرائع نے بتایا کہ پی آئی اے کی جانب سے تفصیلات کی فراہمی کے بعد سیکیورٹی پرنٹنگ پریس کراچی سے ارکان پارلیمنٹ کے لئے ووچرز تیار کروائیں جائیں گے۔
ذرائع کا کہنا ہے کہ رکن پارلیمنٹ کو ایک مالی سال میں 25 ائیر لائن کی ٹکٹس فراہم کئے جاتے تھے اور ہر پارلیمنٹرین کو ٹکٹس کے ساتھ تین لاکھ کے ووچرز سالانہ دئیے جاتے تھے، ائیر لائن کی ٹکٹ پر صرف رکن پارلیمنٹ سفر کرسکتا تھا لیکن اب ووچرز سے ارکان کے فیملی ممبران اور دوست بھی فضائی سفر کرسکیں گے، جب کہ اگر کوئی ممبر پارلیمنٹ ووچرز نہ لے تو وہ کل قیمت کی 70 فیصد رقم کیش میں وصول کرسکے گا، اس طرح ووچرز سے ممبران پارلیمنٹ اور قومی اسمبلی دونوں کا فائدہ ہوگا۔